HNAKPHEK HRING LEH A THATNAK MAKTARA HREKKHATPAWL

Hiang hnakphek(hring) hi American ihsin a rak thok hmaisabik si dingih zum a si. Century 16 lai ah Portugal pawl hin Asia ram ah an run kenglut ih cumi hlanah hin cun Asian mi pawl hin hnakphek an rak ei dah hrih lo si awm khi a si. Leitlun ih hnakphek phambik ram hi India a siih ramdang ih zuarsuahnak lam khalah siseh, hnakphek ro tuahnak lam khalah siseh India hi pakhatnak a si ringring lai tuini tiang in.

Thil thak ngainatu hrang ahcun kaa a thawter in rawlei khal a manhla ter phah zet. Culawng si lo in, harhdamnak hrang khalah thil thahnem ngaingai a rak si bet. Hnakphek (hring) ah hin Vitamin A, Vitamin B6, Vitamin A, Iron, copper, Potassium (protein khal malte a nei tel ve) tha pawl an um ih thaw tak ih ei mi si cingin thatnak mi a pe thei bet hi cu a ei a manhla bet cuang a bang.

Hnakphek(hring) ih thatnak hrekkhatpawl tla cu...

1) Mit hrangah a tha. Vitamin A nei tha zet a si vek in mit ih hmuhnak thazang a cakter ih mit na khal kumtluan in a kilveng thei.

2) Vun a mawiter thei. Vitamin C a neih ve mi hin vun a damter in a tliangter sinsin ve.

3) Taksa a dam tha ter thei.

4) Pumpi ih rawl a rialmi a bawm ih sunglam a cakvak ter thei, thak luan leh luarkai ih ei ciamco tel lo in. Hi khal hi Vitamin C ih hnatuan phunkhat a si.

5) Cuap lam buainak phunphun in  mi a kilhim thei. Khawsik, khuhkhuh leh cuap kansar tiang nitin hnakphek kan eimi in in rak kilhim sak thei.

6) Ruhcang khal a hrisel ter thei in a cak ter sinsin thei.

7) Vun cuar mai lo ding khal in hna a tuan thei. Upat ruangih taksa cuar mai ding khal hnakphek ei theu tu'i hrang ahcun a fuung (muang) phah thei.

8) Hnakphek kan eimi hin kan taksa sunglam ih tursiapawl a thianfai thei ih sungdawk (kawzuut) mai lo ding khal in mi a bawm thei.

9) Hnakphek hring in kan taksa ih thau ummipawl a demter thei ruangah ttawl(weight loss) dingin nasa tak in mi a bawm thei.

10) Hnakphek in mi a harhvang ter thei. A thak kan eimi hin thluak a zangkhai ter tla kan ti thei.

11) Pumpi kansar cang lo dingin a kilhim thei. Pumpi lam natnak dang a phunphun khal a kil thei.

12) Cilri a putter thei ruangah taksa hrangih thil tha a si.

Oh.. cule, hnakphek hin Vitamin C pai tam tiih kan theih lar zet ,Orange (ser thlum) hman hi a let ruk hrawng in Vitamin C pai tam ah a hlaih thotho lai.

Milai hrang ih a siatnak dang hran ciamco hi fiangfai in rel ding a um lemlo ti sehla a sual tam lo ding. Sinan, mi a thak thei nasa ih luarkai deuh ih ei in kaa a aatter theh thei bangin pumpi khal a sahal theh ter thei ve. Curuangah luarkai tuk ih ei ding cu a si lo lawlaw.